شرائح عملي 2 لهستو II

السلام عليكم~ :)

 اليكم صور العملي  2 لــ هستو II 

شرائح عملي الهستوII - 1

شـرائح عملي هستو II 

اول عملي ~:) كان عن الجلد - و بداية GIT

مكتب الاستعارة بقسم الاناتومي~

السلام عليكم~ 

كيف هي احوالكم يا دكاترة ~ :3

ان شاء الله تكونو بخير 

اليوم حنقول لكم عن مكتب استعارة العظام :D 

لسنوات الاولة من سنوات الطب ...

بما ان بنقرو في الاناتومي اجزاء الجسم من عظام و عضلات بالتفاصيل ..

و كذلك في امتحان عملي لذلك .. لدلك لازم من ان كل طالب يمسك بيديه

 و يشوف بعيونه الموضوع قدامه :| 

و هكذا وجد مكتب الاستعارة .. في قسم الاناتومي

ممكن تستعيرو منه عظام للموضوع للي تقرو فيه .. زي سمستر الاول 

ممكن تستعيرو الابر ليمب.. 

و من الضروري جدا لما بتستعيرو تجيبو معاكم بطاقة الهوية "او اللي اسمها بطاقة الطالب" 

بتقعد في المكتب متاع الاستعارة و انت بتاخد العظام و يوم بترجع العظام بتسترجع بطاقتك~

و كذلك في حاجة مهم هو يوم الاستعارة ..اضن سمستر الاول لو ما خانتني الذاكرة 

ممكن تستعيرو يوم الاثنين و تعيدو العظام يوم الاربعاء .. و سمستر التاني يوم الاحد تاخدهم 

و يوم الثلاثاء تعيدهم~

V_V المكتب تلاقوه باب صغير على اليسار اول ما تخشو قسم الاناتومي بدور الاول من الجهة

 الامامية اضن *من جهة الدرج اللولبيه :P وين ديما ينشرو في النتائج *

... حتستفيدو منه لان مهم جدا تطلعو على العظام و اجزائها و شكلها .. ما تهزوش عليه~ :D

بالتوفيق ~

مناهج كلية الطب البشري ~

السلام عليكم ~

كيف هي احوالكم ~؟

V_V 

ااااااااه -تنهد- الاحد القادم دراسة بتبدا!
*_* ما قدرتش نفهم العلقية اللي يدرسو بيها؟ 

دكتور يقول بيبدا محاضرته الاحد و الباقي مستمرين بالعطلة!

>_> يا جماعة استقرو على رائ؟ 

عطونا عطلة شهر بالراحة بدون فوضي!

ما علينا~ :3 خلينا في موضوعنا~

المهم لقيت رابط لمنهج كل سنوات البشري :D

من فترة هوا عندي الرابط *مش عارفة من عطهولي*

لكن بارك الله فيه! + بارك الله في اللي حملو المنهج كامل 

بجميع المواد ~*-* تخيلو! من سنة اولي لـ خامسة

ما شاء الله عليه.. هو مشروع مدايرينه  منتدي"All Doctors كل الدكاترة" من الجامعة

لكن المنهج مقسم كـ نظام سنة .. مش سمستر *ركزو عليها*

اول ما تخشو رابط التحميل ديرو Skip AD 

و يطلع لكم بعدها رابط المنهج في Drive google 

مقسم المنهج اولا ع حسب المواد بعدها الدكتور و بعدها لـ فيديوهات , صور , تسجيلات :)

ان شاء الله تستفيدو + ادعو اللي وفره المنهج *بارك الله فيهم ربي يفتح عليهم U3U * 

الروابط : *اضغط على السنة*

سنـــة أولـــي

سنـــة ثــانيــة

سنـــــة ثالثـــة

سنــــة خـامسة 

المصطلحات الطبية

السلام عليكم :>

شن حالكم .. مع النتيجة؟ X"D ههههه ربك يستر! 

مع علينا .. الحمد لله على كل حال .. الحمد لله اوله و اخره! :) تفائلو ~

خلينا في موضوعنا اليوم.. اللي هو المصطلحات.. و ممكن اهم حاجة في التعلم هي اجادة لغة التعليم.

و اكثر شئ يعاني منه طلاب الطب هي صعوبة و قصور في دراسة و فهم اللغة اللي يدرسو بيها "اللغة الانجليزية" 

و هي اصلاً لغة فيها الكثير من المصطلحات اللي نشوفو فيها غريبة كـ مبتدئين .. او لها مصادر من الاغريقية او اللاتينية

و عن نفسي حاولت كل كلمة او مقطع يذكره الدكاترة بالمحاضرة نكتبه بالهامش في الشيت كـ مرجع .. و لكن فكرة ان 

في هلللللللللللللللباا كلمات و تتكرر في الطب كـ سوابق - لواحق :/ زي : Bi = ثنائي - مزدوج 

و صدفة يوم مشيت لمنتدي كل الدكاترة نشوف في المنهج و شيتات و كتابات القديمة *ممكن تاخدهم* 

لقيت كتاب قدددديم :3 من سنة 1997  اسمه "لغة العلوم الطبية " لدكتور الزروق السنوسي

 لمصطلحات فيه كلمات و معانيها و نطقها.. الباين انه كتاب مصطلحات كان يدرس في الاعداد الطبية X"D

فيه

زي اللواحق بهده القائمة  ~

اللواحق = suffix

-ac , -al له علاقة بـ             relating to             cardic, neural

-cyte خلية                         cell                       leukocyte (WBC)

-emia  دم                          blood                   leukemia , anemia 

-itis  التهاب                        inflammation       heoatitis , dermatitis 

-logy عِلم                           science                biology , histology

-oma تورم                         tumor                   carcinoma , sarcoma 

-plasia نمو                        growth                 hyperplasia , hypoplasia

-pnea تنفس                        breathing             apnea ( no breathing)

-stasis ركود                      stagnant               hemostasis

و غيرها من الكلمات تلاقوها في الكتاب .. 

و نسخته الكتاب لـ PDF

لتحميل النسخة 

هنـا

اول ما تدخلو الرابط انتظرو دقائق و بعدها اضغطو Skip AD

يطلع لكم موقع التحميل "عرب شير" 

مساحته 12.29 ميغا بايت

:) دعواتكم~ سلاام

مكتب المبايعات في الجامعة ..لـ كتب ارخص !

السلام عليكم~ 

كيف كانت عطلتكم؟
عن نفسي ما استمتعت بيها~ TT^TT

غداً بداية الدراسة و سمستر جديد للكل :)

ان شاء الله تكون بداية موفقه للجميع 

و اليوم سأخبركم بطريقة للاقتصاد و الاستفادة من المنحه 

و عدم التعرض للخداع :| من المكتبات

الكل يعرف ان الطلاب بصفة عامة حالتهم المادية في الحضيض X"D 

اسفة بس هذه هي الحقيقة.. خصوصاً طالبـ \ـة الطب

لان دوامهم يومياً و ساعات طويلة و كتبهم بـ 40 دينار فما اكثر 

و الشيتات كثيرة .. فما بالك من المتطلبات الاخري كـ القهوة او المواصلات 

و الاتصلات ..الخ

في الدول الاخري لديهم تخفيضات للطلاب علي العكس تماماً عندنا :| 

و على ذكر الكتب و اسعارها .. الحكومة قامت كـ خطوة اولي لتوفير

الكتب لطلاب بثمن ارخص 

و هكذا وجد قسم او مكتب المبايعات في الجامعة "كلية الطب البشري"

فيه كتب طبية لطلاب البشري و الاسنان و كذلك الصيدلة و البيطري و كذلك للتمريض 

و كل كتاب سعره نصف قيمته في المكتبات العامة . 

مثل كتاب Junqueira's Basic Histology سعره 35 د.ل في المكتبات خارج الكلية

اما في المكتب فتجده بـ 16.5 د.ل اي بمعني نصف السعر دفعته الحكومة

 .. تخفيضاً و مساعدةَ لطلاب :) فـ لذلك انصح كل من يرغب بحصول 

على كتاباُ طبيا فليتفقد المكتب اولاً .. 

صحيح انه ليس هناك كل انواع الكتب الطبية.. بس المهم موجود :) 

فمكتبتي المتواضعه استجمعتها من هناك *^* رائعه صح؟

و استفدت منها جدا في السمستر الاول ..لو ما فهمت شئ من الشيتات ارجع للكتب لشرح و الصور التوضيحة!

فلا تعتمدو على الانترنت و الكمبيوتر كثيراً..لان باستمرار انقطاع الكهرباء و الانترنت..لا يمكنك استخدامهم :>

مكان المكتب .. بمبني المكتبة "مكتبة الجامعة" في كلية الطب البشري.. اول ما تدخلو المبني بالطابق الارضي توجهو خلف

الحواجز تلاقو باب امامكم لصالة كبيرة بها رفوف كتب :) هذا هو مكتب المبايعات 

ههههه اعرف ان وصفي غبي X"D اسفة.. و ممكن تسألو الامن اللى تلاقوه اول ما تدخلو المكتبة ~

- صورة لما تحتويه المكتبة من كتب - 

هذه الكتب للعرض يعني تختارو كتاب و تطلبو من المسؤول هناك عن نسخة و فيجيبها 

لك من المخزن  <3

-----------------------------------------

و لكن لشراء الشيتات او الكتب الاخري عليكم اخدها من احدي المصوارتي بالجامعة بس فكرو دوما قبل شراء 

اي كتاب او شيت منهم..لان احياناً يخدعونكم :"| ... لا جدياً مستغلين الفرصة

 .. و كل مكتبة "مصور" يبيع على هواه و  بسعر اغلي! :| *للاسف امر مؤسف*

مثلاً : ذات مرة البنات في مجموعتي نصحوني بكتاب لـ تجميعة الاسئلة لـ اناتومي قالو ان اشتروه بـ 3 دينار فقط

و انا دخلت اول مصور امامي لاشتريه كذلك *^* ... و ما ان ادفع قال بان سعره 5 دينار! 

و لماذا؟ لانك طالب\طالبة محتاجة للشيتات او الكتب و لن تجادله فـ غصباً عنك راح تشتريه :| و منذ ذلك الحادث و انا انتبه لما 

اشتريه و للاسعار , لان ما في رقابة على الامر, و اسوء شئ ما في حدا بالكلية ممكن يسمع شكواتك! >_>* 

اه كذلك عند شرائكم للشيتات من الافضل شرائها على دفعات "كل دفعه تحوي شيتان 2 على الاكثر" و بذلك تكتشفو الامر

لو رفعو من سعره و ما الى ذلك.. لان احيااناُ أراقب الطلاب يشترون بـ 10 شيتات دفعة واحده, و يدفعون 45 دينار 

او اكثر ..و لا يسألون حتي عن السعر , غباءًا منهم لان بذلك يسمحون بخداعهم.

فـ انتبهو للامر :) و دافعو عن حقوقكم~ 

و ان شاء الله نكون افدتكم <3 بالتوفيق جميعا -ب-

1st semester "Med school"

السلام عليكم :) يا بشريون 

كيف حالكم.. ان الله بخير.. و تكون مستمتعين بالعطلة -ب- لان جايكم الهم قريباً هههههه 

حاليا حتي اني زيكم في عطلة -ب- كملت سمستر الاول للبشري و نستنه في النتيجة اللي ما نبيهاش X"D 

حاسه انها بتكون دمار عارفة روحي :") و لكن ان شاء الله خير!

و مش متحمسه ابدا لسمستر الجاي X"D نبي عطلة طويلة الاجلّ! 

-حالتي-!

و بما اني بلوقير .. و مش اجتماعية =ب= قررت ان ندير مدونة للنصائح + شرح + حاجات تخص البشري

و تجاربي او اشياء تسهل الدراسة باكبر قدر ممكن هههه بما اني انسانة كسولة للاسف :P 

و توا نشرحلكم سمستر الاول شن هواّ؟ 

هوا عبارة عن سمستر مدته 4 اشهر اضن :| فيه تتعذب و تتبهدل و تحس نفسك بانك useless و نَكِــره!

من الهم و العوج اللي راح تشوفه~ الاعداد قدامه لا شئ! 

V_V ما علينا خلينا في المنهج!ّ

بتقرو 4 مواد :      اناتومي - Anatomy 

                        فسيولوجي - physiology

                       هستولوجي - Histology 

                       بايوكيمستري - Biochemistry

و كل مادة لها طريقة خاصة لدراسة X"D لذلك اتركو طريقة عبادة الشيات

 اللي تعلمتوها زمان! >>ع قولت د.محمود و حاولو تربطو المنهج بطريقة ممتعه ~

نبدو

بالاناتومي | Anatomy 

اكثر مادة حبيتها :") حلوة و تحسسك انك فعلاً تقرا طب :D 

في الاناتومي بتقرو 3 مواضيع اذا حسبنا الانترودكشن "Intro"

هما : 

     

     1- intro :عبارة عن اناتومي عامة يحكي لك عنها بصفه عامة و تراكيب و جو.. بسيطة نسبياً الجزئية هذه

     2- embryology : هنا بتريشو شعركم :D جزئية مش سهلة بكل ! تبي ترررررركيز~ و ربط الاحداث

           لان كله يبي تخيل و يبي حد يفهمهولك كويس

     3- upper limp : صح طووويل و يبي حفظ هلبا لكن سهل لو تركز مع الدكتور\ة و ممتع هنا تبدا تحس 

     انك طالب طب بشري :3 في الجزئية هذه تبدو تقرو العظام و اجزائها و العضلات و النيرف و الارتري

     و الفينز متاع الابر لامب "الجزء العلوي من الجسم" و شوية حاجات من الصدر و الظهر :3 لكن ممتع 

     لو تركز و مع المنهج و قريتو اول باول

تقسيم الدرجات في الاناتومي : 

                               20 درجة نصفي نظري - 30 درجة عملي - 50 درجة نهائي 

امتحان العملي:

                     حرام عليكم لو ما تجيبو درجة مليحة فيه لان سهلة بصدق.

                    يجيبو لك مجسم "عظمة او عضلات..الخ"و يحط على حاجة معينة

                   سهم او ورقة و يقولك هذا شن اسمه و تكتبهولهم في ورقة بس :) 

اهم الشيتات و الكتب كمراجع : 

الشيتات من الافضل انك تاخد متاع الدكتور اللي يعطيكم ..مثلاً دفعتي درستنا د.سعاد و هي شيتاتها يشبهو شيتات 

د.احمد سليمان "رئيس قسم الاناتومي" > هو نفسه كاتب شيت الامبريو :>

فـ شيتاتهم كويسات و كذلك للمساعدة ممكن تابعو او تسمعو تسجيلات و فيدهات لـ د.خالد ميلاد و د.محمود أشرف 

لان طريقة تدريسهم ممتعه و تحفظ بنفس الوقت .

المراجع و الكتب |

                              عن نفسي خديت هاذم و استفدت بيهم :>

             - Gray's anatomy 

             - langman's medical embryology

             - sobotta anatomy 12th edit . >>هوا جزئين يعني كتابين بس كتاب جزء الاول فيه الابر لامب

             - Mcminn's colour atlas of human anatomy

و كذلك في كتب لسلسلة اناتومي لـ دكتور احمد كمال للامبريو و انترو و أبر..

و الافضل انك تدرس بالشيتات مع الاستعانه بالكتب مع كتابة تجميعات لك او ملاحظات 

مع نقاط مهمة اثناء الدراسةو تعوضو على كتابة الاسماء "الاجزاء و الاشياء" مع تذكر 

صور للموضوع او فيديو توضيحي :>

ملاحظة : المادة مش محتاجة كورسات زي ما يعتقد البعض.. بس لو ما تقدرش تفهم من محاضرات الجامعه او 

من كورسات المجانية في منتدي كل الدكاترة .. فانصحك بكورس :))

فسيولوجي | Physiology

قسم الفسيو ممكن اكثر قسم مراعي لطلاب و ما الي ذلك..

صح منهجه دسم بس سهل و مرتبط ببعضه يعني تفهم حاجة تستهل عليك اللي بعدهّ~

و مسهلين العملية بانهم وضعو كتب معتمدة للكلية خير من كل سنة يطلع شيت جديد 

و كل دكتور مداير منهج بروحه :D ..و لكن كالعادة مش حتقدر تحصله الكتاب

الا بستين الف واسطه X"D و دائما يقولو تموو من المخزن

و مايجيبوهم الا بنصف السمستر ..و هكذا :)

و لكن يمكنكم نسخ الكتاب تلاقوه مطبوع في المصور .~

اهم المواضيع اللي بتدرسوها 

                              - intro and nerve system

                              - Nerve and muscle

                              - Blood

                              - GIT

تقسيم الدرجات : 

                     30 درجة امتحان نظري نصفي - 70 درجة نظري نهائي

عملي ما فيش لكن في ديسكشن " Discussion " و اللي ما قدرت تفهمه في المحاضرة ممكن تسأل عليه غادي .

اهم الشيتات و الكتب كمراجع : 

الشيتات زي ما قلت ما فيش .. لان فيه كتب معتمده من الكلية اصدرتهم ..و كتب تتأخر في صدور و لذلك ممكن

تاخد نسخة مصورة من الجزئية اللي بتدرسوه .. لان مش حـ تمشو في المنهج بالترتيب زي الكتاب.

اما المراجع ممكن تستعينو بالكتب الاتية :

                                             - Review of medical physiology 

                                              - concise medical physiology 

                                             1st year Dr. Osama Abi El nasr

المادة مش سهلة و مش بسيطة ..ع قد ما تقرا على قد ما تجيب درجات و دكاترة الجامعة ما شاء الله عليهم :> 

شرحهم يكفيك...و ممكن تستعينو بدكتور   او دكتورة مريم أشرف موجودين في منتدي كل الدكاترة ما يبخلو عليكم في الشرح

و ما شاء الله شرحهم ممتع ~

بايوكمستري | Biochemistry

:")) -دمعت عيناي-

 "اسوء قسم في الجامعة" جملة يقولها لك كل طالب طب بشري في الكلية..

و جربته :| قسم مش مراعي ابدا للطلاب يدرسوون كمستري مش بايوكمستريّ!

في هذه المادة لازم تحضرو المحاضرات متاع الجامعة و تسمعو لـ نقاط المهمة اللي يقولو فيها ~

و تكتبو معاهم او تسجلو المحاضرات ..كل حاجة عبيطة تحسها تنقال 100% بتجيك في الامتحان -بوكر فيس-

زي ما قال لنا اخر دكتور عطانا جزئية الـ DNA & RNA و في اخر محاضرة في المنهج بكلّ ..

قال ان في السنوات اللي فاتو جتهم بنت تخاصم فيهم كيف يساوها مع طالبين\طالبتين بنفس الدرجة "شورها مسكرة الدرجة">مدري

و بسببها القسم بدي يدير في اسئلة تعجزية ليوسعو مدي الممتاز و الجيد جداً و الجيد..اكثر :| *الله لا يوفقها* >_>*

عليك غباء.. توا هذا كلام ينقال لطلاب في اخر محاضرة في السمستر؟؟

و زاد عليها قال ان 20% من الاسئلة تجي من الشيتات اما الباقي من المحاضرة 

-شكلي بعد ما قال الكلام -

شوي و تعركت معاه  X"D

هذا كله قالوه لنا في اخر محاضرة للمنهج.. يعني فات الاوان! -مش شئ يكرهك في الحياة؟-

المهم اهوا اني قلت لكم من توا احذرو ؛-؛ ..بعد ما تحضرو محاضرات الجامعه اسمعو تسجيلات دكاترة تانين زي د.بشير

او خشو كورس :| و اقرو من الشيتات الدكاترة اللي يدرسوكم في الجامعه ..

و رد بالكم تفوتو العملي ..لان الحضور و كتابة التقرير 

او ورقة العمل عليه درجات *^* *5 درجات ينجحو و يعقبو*

هما 3 عملي يعني 3 مرات بس بتمشو .. و امتحان العملي يكون كتابي "نظري" ورقة بروحه 

في اخر الامتحان النهائي ..الاسئلة MSQ عن العملي اللي درتوه زي هذاكا شن لونه طلع؟ شن السبب؟ 

لو درت هكي شن يصير؟ تقدرو تقروه هذا كله من شيت العملي .. :>

تقسيم الدرجات :

                 15 درجة امتحان نظري نصفي + 5 درجة حضور عملي 

                 15 درجة امتحان عملي + 65 درجة امتحان نظري نهائي

المنهج : بتدرسو |

Intro - Carbohydrate - Amino Acid - Enzyme

 - Vitamin - Fatty acid - DNA & RNA

يعني نبذه عليهم ..اما الميتابولزم في السمستر الثاني.~

اهم الشيتات و الكتب كمراجع : 

الشيتات زي ما قلت من الافضل اتباع الشيتات متاع الدكتور اللي يعطيكم فكل جزئية دكتور تاني..

كتب كمراجع ممكن تستخدمو | 

   Lippincott's illustrated reviews Biochemistry

شيت العملي :) مهم كذلك 

هستولوجي | Histology

مادة سهلة و تافهة بس ركيكة X"D ... ع قد ما هي هكي مرات تقعد لك..! ما تهزاش عليها

صح مواضيعها عادية و سهلة و لكن تلخبط هلبا تبي تركيز على قد ما تقرا تنجح..~

العلمي متاعها على راحتك  لو ما تبيش تحضر فوته لكن لازم تحضر المراجعة متاع السلايدات قبل الامتحان العملي:

لكن ننصح انكم تحضرو العملي لان "زيادة الخير خيرين" يشرحلكم المعيدين على بروجكتر المواضيع و كيف تميزهم زي المحاضرة

و بعدها تخشو للمعمل فيه مجهزين مجاهر فيهم السلايدات تمرو عليهم و تشوفو بعيونكم الحاجات اللي تكلمو عليه قبلها .. 

ديرو عليهم دوره و اسئلوو و صورو و خدو راحتكم و جو! 

و اهم حاجة اللي ما تفهماش اسئل عليه.. لانك تسأل في المعمل يساعدوك و دكاتره المعيدين لطفين يشرحو و يعطو في طرق

مبسطة للحفظ و سهلة .. ~ :) و بنفس الوقت اثبت المعلومات ~!

المحاضرات من المهم تحضروها تريحكم من الضيااااع في الشيتات وقت الدراسة قبل الامتحان ..

و كونو دائما Update مع شيتات اللي تنزل و احضرو مع دكاترة الكلية لان هما نفسهم اللي بيديرو الاسئلة كل واحد مسؤل 

على الجزئية اللي عطها.. و كل دكتور عنده طريقة خاصة في الشرح و اسلوب الشيتات.. زي مثلا د. ايمان طلحه 

ما شاء الله عليها شرحها تطلع من المحاضرة فاهم و حافظ ..و لكن لو جيت بتقرا من شيتاتها بدون ما تحضر محاضراتها 

مش حتقدر تفهم , شيتاتها فيهم شوية دوه تهزا عليهم لكن يوم تحضر المحاضرة تبدا كل كلمتين في شيت وراهم الف سؤال و شرح طووويل..لذلك الحضور مهم~ 

اهم الشيتات و الكتب كمراجع : 

المنهج زي في الصورة مواضيع مختلفة عن التركيب و الاساسية اللي فيهم و ما الي ذلك~

و لذلك زي ما قلت خد الشيتات حسب الدكتور اللي يعيطكم.

مثلا د. ايمان عطتنا cytology و genetic 

اما د. هنا عطتنا الـ nerve و muscle و ..الخ

و كذلك في د.عبد العزيز ما شاء الله عليه في شرح الهستو بس ما عنداش شيتات :> و هوا نفسه الدكتور اللي بيعطيكم 

المراجعه اخر السمستر متاع السلايدات العملي و ما تفوتوها ابدا *^*

كتب المراجع في كتابين قالو عليه القسم لنا.. لكن اني خديت واحد بس و استفدت به كثيررراً ~

اسمه  

Junqueira's Basic Histology

و كذلك في كتاب د.هناء يشكرو فيه الطلاب.. بس انا ما قدرت نقراه X"D *sorry*

و ما تنسوش انكم تشترو قواميس طبيه.. لان في ليبيا يهرب الضئ اغلب الوقت

و ما تعبوش ع النت او غيره من الاجهزة الالكترونية -ب- الكتاب افضل صديق

و هكدا نكون عطيكم إن شاء الله فكرة شاملة عن سمستر الاول~

و رد بالكم تسمعو كلام السووس "اللي موجود في كل دفعه" 

يقولو فوتها المحاضرة او انه ما قراش شئ! او مش مهم هذاّ!

راهو يكذبو عليكم.. كل محاضرة مهمه و كل شئ مهم في المنهج محط اسئلة

و اغلب كذابين تلقاهم ماشين خمسين الف كورس و سامعين مليون تسجيل >_>*

و اهم حاجة ما تخدوش كلامي كـ 100% لان مرات الحاجة اللي اني مشت معاي ممكن ما تقدرهاش

او في حاجات ما جربتهم اني او ما مشتش معاي ..تقدر تساعدك و تمشي معاك..

دائما جرب و اصنع طريقك بنفسك :> <3

* و دااااااااااائما سجلو المحاضرة اللي تحس في روحك ضاائع فيها ~ ترجعلها لما تستريح -ب-

و بالتوفيق للجميع